Мадриднинг «Атлетико» клуби «Тоттенхэм» ҳимоячиси Кристиан Ромеронинг трансферини расман эълон қилди. 28 ёшли аргентиналик футболчи мадридликлар билан 2031 йилнинг 30 июнига қадар мўлжалланган шартнома имзолади.

Ромеро 2021 йилдан бери «Тоттенхэм» сафида тўп суриб келаётган эди. Лондон клуби таркибида ўтказган 5 мавсуми давомида у 156 та ўйинда майдонга тушиб, 13 та гол урган ва 7 та голли узатмага муаллифлик қилган. 2024/25 йилги мавсумда аргентиналик футболчи «Тоттенхэм»га Европа Лигасида ғолиб чиқишга ёрдам берди ва турнирнинг энг яхши ўйинчиси деб топилди.

Англия клубига ўтишдан олдин Ромеро «Бельграно», «Женоа», «Ювентус» ва «Аталанта» жамоалари шарафини ҳимоя қилган. «Аталанта» сафида 2020/21 йилги мавсумда у А Сериянинг энг яхши ҳимоячиси унвонига сазовор бўлган эди.

Ромеро Аргентина терма жамоасида 2021 йилнинг июнь ойида дебют қилган ва шу вақтгача 58 та ўйин ўтказган. Миллий терма жамоа билан биргаликда у 2 марта Америка Кубоги ва 1 марта Жаҳон чемпионати ғолибига айланган.

Transfermarkt портали маълумотларига кўра, трансфер суммаси 40 миллион еврони ташкил этди.