«Челси» вингери Михаил Мудрик узоқ муддатли танаффусдан сўнг жамоа билан машғулотларга қайтгани ҳақида гапириб берди.

Мудрик 2024 йилнинг декабрь ойидан бери давом этган антидопинг суриштируви якунлангач, шу ёзда яна майдонга қайтишга рухсат олди.

«Мен бу 18 ойни ўзим учун худди мавсумга тайёргарлик бўлди деб айтган бўлардим. Бутун шу вақт давомида тўхтовсиз ва қаттиқ машқ қилдим. Таслим бўлмадим ва шунчаки қўлимдан келганича бор кучим билан ишлашга ҳаракат қилдим», — деди футболчи «кўклар»нинг расмий сайтига берган интервьюсида.

«Ҳафтада олти кун машғулот ўтказдим. Толиқишни чиқариш (тикланиш), уйқу режими, овқатланиш — ҳаммасига жиддий эътибор қаратдим. Барчаси одатдагидек эди, фақат кунига икки маҳалдан машғулот бўлди.

Менинг мақсадим — қайтиш ва футбол дунёсига яна ўз имкониятларимни кўрсатиш эди. Бу менинг вазифам эди ва бунинг учун нима қилишим кераклигини аниқ билдим. Фақат тинимсиз меҳнат орқали нимагадир эришиш мумкин».

Украиналик 25 ёшли вингер Австралия ва Осиё бўйлаб ўтказилган мавсумлараро турне вақтида «Челси» сафига қўшилди ва Гонконгдаги «Ювентус»га қарши ўртоқлик ўйинида захирадан майдонга тушди. Ҳозирда у Кобҳэмдаги базада жамоа билан бирга машғулотларни давом эттирмоқда.