"Барселона" ярим ҳимоячиси Педрининг жамоавий машғулотларда иштирок этмаётгани билан боғлиқ вазиятга ойдинлик киритди.
Испаниялик футболчи ўтган чоршанба куни миллий жамоанинг бошқа аъзолари билан бирга клуб ихтиёрига қайтган, аммо ҳозирча умумий гуруҳ билан машғулот ўтказмаяпти.
Бу ҳолат Педри янги жароҳат олгани ва шу сабабли мавсум бошини ўтказиб юбориши мумкинлиги ҳақидаги миш-мишларга сабаб бўлди.
Бироқ "Барселона" футболчининг жароҳат олгани ҳақидаги хабарларни рад этди. Каталония клуби ижтимоий тармоқларида Педрининг суратини эълон қилиб, у "мавсумолди тайёргарликнинг дастлабки кунларида махсус тайёргарлик дастури асосида ишлаётгани"ни маълум қилди.
"Барселона" 16 август куни мавсумолди ўртоқлик учрашувида "Базель"га қарши майдонга тушади.
