"АЗ Алкмаар" ярим ҳимоячиси Кес Смит Испания Ла Лигаси грандларининг трансфер нишонида бўлиб турибди.
Журналист Хосе Феликс Диаснинг хабар беришича, 20 ёшли футболчига "катта учлик"нинг барча вакиллари — "Барселона", Мадриднинг "Реал" ва "Атлетико" клублари даъвогарлик қилмоқда. Шунга қарамай, трансфер ушбу ёзда амалга ошиши амримаҳол: "қаймоқранглилар" таркибни тўлиқ шаклланган деб ҳисоблашмоқда ва кутилмаган ҳолатлар бўлмаса, ҳеч кимни сотиб олишни режалаштиришмаяпти; "кўк-анорранглилар" бор эътиборини Родрининг трансферига қаратган; "матрасчилар" эса майдон марказини Мортен Юльманн билан кучайтириб олишди ва у учун 40 миллион евро тўлашди.
Transfermarkt талқинига кўра Кес Смитнинг бозор қиймати 25 миллион еврони ташкил этади, аммо "АЗ Алкмаар" бундан анча кўп — 60 миллион евро сўрамоқда. Нидерландиялик футболчининг шартномаси 2028 йилда ниҳоясига етади.
