Португалия чемпионатининг 2-туридан ўрин олган «Брага» ва «Жил Висенте» ўртасидаги 16 август куни бўлиб ўтиши керак бўлган ўйин қолдирилди. Бунга «Брага» футболчилари орасида ошқозон-ичак инфекцияси тарқалгани сабаб бўлди.
Жамоа матбуот хизмати томонидан эълон қилинган баёнотда айтилишича, хасталик жамоанинг еврокубок ўйини учун Болгарияга қилган сафари чоғида тарқала бошлаган. Охирги бир неча соат ичида вазият янада ёмонлашди.
Ҳозирда «Брага» тасарруфида фақат 3 та дарвозабон ва 7 та майдон ўйинчиси қолмоқда. Шу сабабли клуб Португалия чемпионати раҳбарияти ҳамда «Жил Висенте» билан боғланди. Томонлар учрашувни қолдириш бўйича бир қарорга келишди. Баҳснинг янги санаси кейинроқ маълум қилинади.
