"Реал Мадрид Кастилья" ҳужумчиси Лорен Суньига фаолиятини Ливия чемпионатида давом эттиради. 23 ёшли футболчи "Ал-Мадина" клубига доимий трансфер асосида ўтди.
Маълумотларга кўра, Суньига янги жамоаси билан уч йиллик шартнома имзолаган. Шу тариқа, у 2024 йилдан бери тўп суриб келаётган "Реал" фарм-клубини тарк этди.
Суньига аввал "Малага" академиясида тарбияланган ва клубнинг асосий жамоасида ҳам майдонга тушган. Кейинчалик у "Реал Мадрид C" сафида ўйнаб, 2024 йилда "Кастилья"га кўтарилган.
Испанияда туғилган футболчи аввал Испания U19 терма жамоаси шарафини ҳимоя қилган, кейин эса Экваториал Гвинея миллий жамоасини танлаган. Суньиганинг кетиши ортидан "Кастилья" марказий ҳужумчи позицияси учун янги вариант қидирмоқда.
