«Арсенал» бош мураббийи Микель Артета Англия Суперкубогида «Манчестер Сити» устидан қозонилган 3:0 ҳисобидаги ғалабадан сўнг жамоаси ўйини ва футболчиларнинг мотивациясига юқори баҳо берди.

«Мавсумнинг бу қадар эрта босқичи учун жуда яхши ўйин бўлди. Шундай даражада ҳаракат қилиш, бундай хоҳиш ва реакцияни кўрсатиш — жуда таъсирли. Футболчиларга уларнинг ўйинини томоша қилиш менга чиндан ҳам ёққанини айтдим», — дея Артетанинг сўзларини Sky Sports келтирди.

Испаниялик мутахассис жамоанинг тайёргарлик жараёни осон кечмаганини ҳам таъкидлади.

«Бироз ҳайронман, чунки мавсумолди тайёргарлик даврида бизда учта турли гуруҳ бор эди. 8 ёки 9 нафар футболчи атиги 5 кун олдин жамоага қўшилди, зарур тестлардан ўтди, бор-йўғи 2 кун машғулот қилди ва шундан кейин мана шундай даражада ўйнади. Бу ақл бовар қилмас ҳолат. Бу бизнинг мотивациямиз қанчалик юқори эканини кўрсатади», — деди Артета.

У жамоа янги футболчиси Христос Цолиснинг ўйинини ҳам алоҳида эътироф этди.

«У жамоага яхши мослашди. Жуда ақлли футболчи, бошқалар шошилиши мумкин бўлган вазиятларда тўғри қарор қабул қилади. Бугун у айниқса тор ҳудудларда жуда аниқ ҳаракат қилди ва икки голли узатма берди», — деди «Арсенал» устози.

Артета ярим ҳимоя чизиғини ҳам юқори баҳолади.

«Биз йилдан йилга ўсиб бордик. Энди жамоада кўплаб етакчилар ва турли сифатларга эга футболчилар бор. Улар бирга ўйнай олади ва шу билан бирга жуда кучли бўлиб қолади», — дея қўшимча қилди у.

Шу тариқа, «Арсенал» ўз тарихида 18-марта Англия Суперкубогини қўлга киритди.