«Манчестер Сити» бош мураббийи Энцо Мареска Англия Суперкубогида «Арсенал»дан учралган 0:3 ҳисобидаги йирик мағлубиятдан сўнг учрашув ҳақида фикр билдирди.

Италиялик мутахассиснинг таъкидлашича, ўйин бошланиши билан ўтказиб юборилган тезкор гол баҳс сценарийсига жиддий таъсир кўрсатган. Шунингдек, у жамоасининг голли вазиятлардан фойдалана олмаганини ҳам қайд этди.

«Ўйиннинг 25-сониясида ўтказиб юборган голимиз, афсуски, баҳснинг кейинги боришига таъсир қилди, деб ўйлайман. Голдан кейин жамоанинг реакцияси анча яхши бўлди.

«Арсенал» иккинчи голни уришига қадар бизда ҳисобни тенглаштириш учун уч ёки тўртта имконият бўлди. Аммо улардан фойдалана олмадик. Кейин иккинчи голни ҳам ўтказиб юбордик ва вазият янада қийинлашди», — деди Мареска.

Шу тариқа, Энцо Мареска «Манчестер Сити» бош мураббийи сифатидаги илк расмий учрашувини мағлубият билан бошлади. «Шаҳарликлар» Англия Суперкубогида совриндан қуруқ қолди.

Мареска жорий ёзда Хосеп Гвардиолани «Манчестер Сити» бош мураббийи лавозимида алмаштирган эди. Италиялик мутахассис бунга қадар «Челси»ни бошқарган.