Австралиялик ёш голфчи Жессиcа Банг Таиландда бош миясига қон қуйилиши оқибатида 18 ёшида вафот этди. Бу ҳақда Австралия хотин-қизлар профессионал голф ассоциацияси (WPGA Tour of Australasia) маълум қилди.
Банг 1 август куни Таиланднинг Бангкок шаҳрида мусобақага тайёргарлик кўраётган вақтида тўсатдан ҳушидан кетган эди. У шифохонага олиб борилиб, шошилинч равишда мия жарроҳлиги амалиётини бошдан кечирган. Бироқ шифокорларнинг саъй-ҳаракатларига қарамай, голфчи соғайиб кета олмади ва 13 август куни вафот этди.
Австралия хотин-қизлар профессионал голф ассоциацияси Бангни “ажойиб ёш истеъдод” дея таърифлаб, унинг вафоти Австралия голф жамоатчилиги учун катта йўқотиш эканини билдирди. Ташкилот марҳум спортчининг оила аъзолари, дўстлари ва яқинларига ҳамдардлик билдирди.
Маълумот учун, Жессика Банг Бангкокда Жанубий Корея аёллар профессионал голф турининг халқаро саралаш турнирида иштирок этишга тайёргарлик кўраётган эди. У 2025 йил охирида профессионал голфчи мақомига эга бўлганидан сўнг қисқа вақт ичида Австралия голфидаги истиқболли ёш спортчилардан бирига айланганди.
У 2026 йил бошида профессионал фаолиятидаги атиги бешинчи турнирида илк ғалабасини қўлга киритган. У Австралиянинг Янги Жанубий Уэлс штатида ўтказиладиган аёллар ўртасидаги профессионал голф турнирининг минтақавий саралаш босқичида ғолиб бўлган эди.
