«Челси»нинг португалиялик ҳужумчиси Педру Нету ёзги трансфер ойнасида клубини алмаштириши мумкин.
talkSPORT маълумотига кўра, 26 ёшли футболчини ўз сафига қўшиб олиш учун «Манчестер Сити» ва Саудия Арабистонининг «Ал-Ҳилол» клуби кураш олиб бормоқда. «Шаҳарликлар» Нетуни яқин вақт ичида «Тоттенхэм»га ўтиши кутилаётган Савионинг ўрнини босиши мумкин бўлган футболчи сифатида кўрмоқда.
Аввал хабар қилинганидек, «Челси» ўз вингерини тахминан 82 млн еврога баҳоламоқда.
Агар Нету «Манчестер Сити»га ўтса, у Энцо Мареска билан яна бир жамоада ишлайди. Мареска аввалроқ «Челси»ни бошқарган.
Педру Нету 2025/26 йилги мавсумда барча мусобақалар доирасида 52 та учрашувда майдонга тушиб, 20 та самарали ҳаракат қайд этди — 10 та гол урди ва 10 та голли узатмани амалга оширди.
