«Насаф» бош мураббийи Рўзиқул Бердиев Қарши клуби бошқарувидаги 500-учрашувини ўтказди. Мутахассис учун юбилей ўйини Суперлига 17-туридан ўрин олган «Пахтакор»га қарши баҳсга тўғри келди.
Қаршида ўтказилган учрашувда «Насаф» Тошкент жамоасига 1:2 ҳисобида имкониятни бой берди. Шунга қарамай, мазкур баҳс Бердиевнинг узоқ йиллик мураббийлик фаолиятидаги муҳим тарихий кўрсаткич бўлди.
Рўзиқул Бердиев бошқарувида «Насаф» қайд этган натижалар:
- 500 та ўйин;
- 263 та ғалаба;
- 121 та дуранг;
- 116 та мағлубият.
Шу тариқа, қаршиликлар Бердиев қўл остидаги учрашувларнинг 52,6 фоизида ғалаба қозонган. Жамоа 76,8 фоиз баҳсда майдонни камида бир очко билан тарк этган.
Бердиев 2012 йил охиридан буён «Насаф» бош мураббийи сифатида фаолият олиб бормоқда. Унинг раҳбарлигида жамоа илк бор Ўзбекистон чемпиони бўлди, бир неча марта мамлакат кубоги ва Суперкубогини қўлга киритди.
54 ёшли мутахассиснинг «Насаф» билан алоқаси мураббийлик фаолиятидан анча олдин бошланган. У 1997–2008 йилларда Қарши клуби шарафини футболчи сифатида ҳам ҳимоя қилган.
