Шотландия футбол ассоциацияси (SFA) ижрочи директори Иан Максвелл ташкилот ФИФА президенти Жанни Инфантинони қўллаб-қувватлашдан воз кечганини маълум қилди.
Аввалроқ Инфантино жаҳон чемпионати ҳуқуқларининг бир қисмини сотиш ғоясини илгари сурган эди. Бу ташаббус Европа футбол доираларида кескин баҳс-мунозараларга сабаб бўлди.
«УЕФАга аъзо 55 та ассоциация вакиллари иштирок этган йиғилишдан буён Шотландия футбол ассоциациясининг позицияси аниқ. Биз УЕФА ва унга аъзо 55 мамлакатнинг умумий позициясига амал қиламиз. Шу боис, Шотландия футбол ассоциацияси 2027 йил бошида бўлиб ўтадиган ФИФА президенти сайловида Жанни Инфантино учун овоз бермайди», — деди Максвелл BBC нашрига берган интервьюсида.
Эслатиб ўтамиз, ФИФА аввалроқ федерациянинг тижорат фаолияти ва турнирларини ташкил этиш йўналишларини бирлаштирувчи FIFA Forward Enterprise (FFE) корхонасини ташкил этиш ниятида эканини маълум қилганди. Шунингдек, янги тузилма улушларини хусусий инвесторларга таклиф қилиш режалаштирилган эди.
Мазкур ташаббус УЕФАнинг кескин танқидига учради ва ҳатто жаҳон чемпионатини бойкот қилиш эҳтимоли ҳақида хабарлар тарқалди. Кейинчалик ФИФА Жанни Инфантинонинг баёнотини эълон қилиб, лойиҳа атрофида келишмовчиликлар мавжудлигини тан олди ҳамда ушбу таклиф амалга оширилмаслигини маълум қилди.
