Португалиялик ярим ҳимоячи «Реал»даги тақдимот маросимида ўз фикрлари билан ўртоқлашди. Унинг сўзларига кўра, клубнинг Чемпионлар Лигасидаги 15 та кубогини ўз кўзи билан кўрганда жуда ҳайратда қолган.

«Мен жуда бахтиёрман. Бу ерга келиб, ушбу залини, шунча кубокларни кўрганингизда... Мен «Реал»нинг қанчалик буюклигини азалдан билардим, аммо стадионга келиб, Чемпионлар Лигасининг 15 та кубогини кўрганингизда, бу инсонга жуда катта таассурот қолдиради. Уларни бу ерда кўриш — алоҳида туйғу. Шундай 15 та трофейга эга бўлган клубда ўйнаш ҳаммага ҳам насиб этавермайди. Мен жуда фахрланаман ва бу клуб учун бор кучимни беришни хоҳлайман», — дейди Силва The Touchline нашри келтирган иқтибосда.

Бернарду Силва «Манчестер Сити»даги тўққиз мавсумлик фаолиятидан сўнг «Реал»га кўчиб ўтди. Португалиялик футболчи Мадрид клуби билан уч йиллик шартнома имзолади.