"Ливерпуль" ярим ҳимоячиси Кёртис Жонс тез орада Миланнинг "Интер" клуби янги футболчиси сифатида таништирилади.
Бугун, пайшанба куни, англиялик футболчи тиббий кўрикдан ўтиш учун Миланга етиб боради. Шундан сўнг у янги клуби билан шартнома имзолайди. Бу ҳақда инсайдер Фабрицио Романо хабар берди. "Интер" 25 ёшли футболчининг трансфери учун "Ливерпуль"га тахминан 35 миллион евро тўлайди. Мазкур келишув ҳақидаги сўнгги хабарлар ҳам трансфер суммаси 35 миллион евро атрофида эканини тасдиқламоқда.
Кёртис Жонс фаолиятида илк бор клубини ўзгартиради. У 2010 йилдаёқ "Ливерпуль" академияси тизимига қўшилган ва 2019 йилда асосий жамоа сафида дебют қилган. Жонс "қизиллар" таркибида жами 228 та учрашувда майдонга тушиб, 22 та гол урган ва 25 та голли узатмани амалга оширган.
