"Ницца"нинг янги футболчиси Аксель Витсель Франция клуби унинг фаолиятидаги сўнгги жамоа бўлиши мумкинлигини айтди. 37 ёшли бельгиялик футболчи шу ҳафта "Ницца" билан яна бир мавсумга узайтириш имкониятини ўз ичига олган бир йиллик шартнома имзолади.
"Фаолиятимни шу ерда якунлашни истардим. Бу ҳақиқатан ҳам ўйлаётган нарсам. Соч турмагини ҳисобга олмаганда, нега Данте йўлидан бормаслигим керак?" — дея Витселнинг сўзларини келтиради L'Equipe.
Ўтган мавсум якунида 42 ёшли бразилиялик Данте "Ницца"да 10 йил ўйнаганидан сўнг профессионал фаолиятини якунлаган эди. Витсель ва Данте бир хил афро услубидаги соч турмаги билан ҳам ажралиб туради.
Витсель фаолияти давомида "Стандард", "Бенфика", "Зенит", Дортмунднинг "Боруссия", "Атлетико" ва "Тяньцзинь Тэда" клубларида ҳам тўп тепган.
