"Nissa"ning yangi futbolchisi Aksel Vitsel Fransiya klubi uning faoliyatidagi so‘nggi jamoa bo‘lishi mumkinligini aytdi. 37 yoshli belgiyalik futbolchi shu hafta "Nissa" bilan yana bir mavsumga uzaytirish imkoniyatini o‘z ichiga olgan bir yillik shartnoma imzoladi.
"Faoliyatimni shu yerda yakunlashni istardim. Bu haqiqatan ham o‘ylayotgan narsam. Soch turmagini hisobga olmaganda, nega Dante yo‘lidan bormasligim kerak?" — deya Vitselning so‘zlarini keltiradi L'Equipe.
O‘tgan mavsum yakunida 42 yoshli braziliyalik Dante "Nissa"da 10 yil o‘ynaganidan so‘ng professional faoliyatini yakunlagan edi. Vitsel va Dante bir xil afro uslubidagi soch turmagi bilan ham ajralib turadi.
Vitsel faoliyati davomida "Standard", "Benfika", "Zenit", Dortmundning "Borussiya", "Atletiko" va "Tyanszin Teda" klublarida ham to‘p tepgan.
