ФИФА президенти Жанни Инфантино 15 ёшгача бўлган футболчилар ўртасида янги глобал турнир ташкил этиш масаласида хусусий инвесторлар билан музокара ўтказди. The Athletic маълумотига кўра, мусобақада ФИФАга аъзо барча 211 мамлакат терма жамоаси иштирок этиши мумкин.
Янги турнир ғояси бейсбол бўйича ўтказиладиган Little League World Series мусобақасидан илҳомланган.
Тодд Боэли бошчилигидаги Eldridge Industries компанияси таклиф қилган лойиҳалардан бирига кўра, мусобақа АҚШнинг Флорида штати, Орландо шаҳридаги ESPN Wide World of Sports Complex мажмуасида ўтказилиши мумкин.
Шунингдек, турнирнинг очилиш ва ёпилиш маросимларини Disney тематик боғларида ташкил этиш имконияти ҳам кўриб чиқилмоқда.
ФИФА 15 ёшгача бўлган футболчилар ўртасида глобал турнир ташкил этиш режасини илк бор 2025-йил декабрь ойида расман маълум қилган эди. Бироқ ташкилот ушбу лойиҳага хусусий инвестицияларни жалб қилиш бўйича музокаралар олиб борилаётгани ҳақида аввал жамоатчиликка хабар бермаган.
Манбага кўра, Инфантино турнирнинг илк учрашувини Исроил ва Фаластин терма жамоалари ўртасида ўтказиш ғоясини ҳам илгари сурган.
Бу таклиф апрель ойида Ванкуверда ўтказилган Конгрессда Инфантинонинг Исроил ва Фаластин футбол федерациялари вакилларини қўл бериб кўришиш ва биргаликда суратга тушишга ундаган, аммо муваффақиятсиз якунланган уринишидан кейин пайдо бўлган.
