Мюнхеннинг «Бавария» клуби ҳужумчи Харри Кейн билан шартномани узайтириш бўйича музокараларни давом эттирмоқда.

33 ёшли футболчининг амалдаги келишуви келгуси йилнинг ўрталарида (2027 йил ёзида) ўз ниҳоясига етади. Abendzeitung нашри хабарига кўра, томонлар ҳалигача битимнинг бир муҳим тафсилотини ҳал қила олишмаяпти: Мюнхен гранди 2029 йилгача мўлжалланган шартнома таклиф қилмоқда, форварднинг ўзи эса узоқроқ муддатли — 2030 йилгача бўлган келишувни имзолашни хоҳламоқда. Шунга қарамай, манбанинг таъкидлашича, музокараларнинг муваффақиятли якунланиш эҳтимоли жуда юқори.

Кейн 2023 йилнинг ёзида «Тоттенхэм»дан «Бавария»га ўтган эди. Англиялик ҳужумчи немис клуби сафида барча турнирларда ўтказган 147 та ўйинида 146 та гол ва 33 та голли узатмани ўз ҳисобига ёзиб қўйган.