Мюнхеннинг «Бавария» клуби Миллий хоккей лигаси (НХЛ) билан стратегик ва кўп йиллик ҳамкорлик бошланганини эълон қилди. Ушбу келишув Германияда НХЛнинг, Шимолий Америкада эса «Бавария»нинг иштирокини ривожлантириш, ишқибозлар билан алоқани мустаҳкамлаш ва футбол ҳамда хоккей ишқибозларини бирлаштиришга қаратилган.
Стратегик шерикликни эълон қилиш маросими «Бавария» қароргоҳида бўлиб ўтди. Унда канадалик ҳимоячи Альфонсо Дэвис ҳамда НХЛнинг машҳур германиялик хоккейчилари Леон Драйзайтль ва Джон-Джейсон Петерка иштирок этди.
Ҳамкорлик доирасида спортлараро ҳамкорлик, ёшлар ўртасидаги лойиҳалар ва қўшма медиаконтент яратиш учун махсус платформа йўлга қўйилади. Шунга ўхшаш ташаббуслар орқали томонлар ҳар икки ташкилот мухлислари учун янги таассуротлар улашиш ва Германияда НХЛга бўлган қизиқишни янада оширишни мақсад қилган.
