"Насаф"-"Пахтакор" учрашуви якунлангандан сўнг меҳмонлар бош мураббийи Мурод Исмоилов журналистлар саволларига  жавоб бериб ўтди.

— Бугунги учрашувда икки хил бўлим гувоҳи бўлдик. Биринчи бўлимда "Насаф" жамоаси жуда яхши ўйин кўрсатди. Ҳимоячиларимиз хатосидан унумли фойдаланиб гол ҳам уришди. Иккинчи бўлимда футболчиларимиз ўзига келишди ва гол ҳам уришга эришишди.

— Сизни бугунги натижа қониқтирдими?
— Йигитларга раҳмат! Натижадан эса қониқдим дейиш ноўрин бўлади. Аммо иккинчи бўлимдаги жамоамиз ўйинидан ниҳоятда қониқдим. Рақиб жамоага ҳам раҳмат. Келган мухлислар ҳам чиройли ўйин томоша қилишиб, баҳра олишди.

— Иккинчи бўлимда жамоалар майдонда ўнтадан бўлиб қолишди. Вазиятни қандай баҳолайсиз?
— Биринчи бўлим тугагандан сўнг, ўйинчилар ўртасидаги зиддиятли тортишув сабабли ҳакам Темурхўжа Абдухолиқовни ўйиндан четлатди.

— Биринчи бўлимдаги жамоангиз ўйини чиқмаслигига сабаб нима деб ўйлайсиз?
— Бугунги ўйин юқори босим остида ўтди. 7 очкони яқинлаштиришимиз керак эди. Ўйинчиларимиз биринчи бўлимда ўзига кела олмади, кўп хатоларга йўл қўйди.

— Жамоангиз ўйинчиларда интизом пасайиб кетмоқда. Улар ҳакамлар билан майдонда кейинги пайтларда кўп тортишмоқда?
— Футболчиларим атайин қўпол ўйнамади. Ҳимоячилар бўлар-бўлмас ҳужумларни ўтказиб ҳам юбормаслик керак. Айнан Даврон Ҳошимовни ҳаракатларини қораламайман. Бугунги ўйиннинг аҳамияти юқорилиги ҳам бунга сабаб бўлди.

— Миладинович кубок баҳсида футболкасини улоқтирган эди. Унга нисбатан чора кўрилдими?
— Миладиновичга нисбатан раҳбарият томонидан қаттиқ молиявий жазо қўлланилди.

— Жамоангизнинг совринли ўринлар учун курашишдаги имкониятини қандай баҳолайсиз? "Насаф"нинг кубок финалидаги имконияти қандай деб ўйлайсиз?
— Жамоамизнинг совринли ўринлар учун курашиш имконияти деярли қолмади. Финал иштирокчиларининг имкониятини 50х50 деб ҳисоблайман.