"Манчестер Сити" жорий трансфер ойнасида таркибини икки нафар ярим ҳимоячи билан кучайтиришни режалаштирмоқда. Бу ҳақда GIVEMESPORT хабар берди.
Манбага кўра, "шаҳарликлар"нинг биринчи трансфери "Лилль" ярим ҳимоячиси Айюб Буадди бўлиши кутилмоқда. Томонлар футболчининг трансфери бўйича келишувга эришишга яқин турибди.
"Манчестер Сити" иккинчи ярим ҳимоячи борасида ҳали якуний қарор қабул қилмаган. Англия клуби бир нечта футболчидан иборат қисқа рўйхат тузган ва унга беш нафар номзод киритилган.
Рўйхатдан "Челси" футболчиси Энцо Фернандес, "Ливерпуль" аъзоси Алексис Макаллистер, "Кристал Пэлас" ярим ҳимоячиси Адам Уортон, "Борнмут" футболчиси Алекс Скотт ҳамда "Рома" вакили Ману Коне жой олган.
"Манчестер Сити" ушбу футболчилардан бирини Буадди билан бирга жамоа ярим ҳимоя чизиғини кучайтириш учун таркибга қўшиб олиш имкониятини кўриб чиқмоқда.
