"Барселона" ярим ҳимоячиси Френки де Йонгнинг клубдаги келажаги яна сўроқ остида қолди. Marca маълумотига кўра, нидерландиялик футболчи билан боғлиқ бир қатор воқеалар клуб ичида норозиликни кучайтирган.
Вазият Жоан Гампер кубоги тақдимотида янада яққол кўринди — "Камп Ноу"даги мухлисларнинг бир қисми Де Йонгни ҳуштакбозлик билан қарши олди.
Асосий муаммолардан бири футболчининг Нидерландия миллий жамоаси сафида Жаҳон чемпионатида олган оғир тизза жароҳати билан боғлиқ. Де Йонг оғриққа қарамай ўйнашда давом этган ва натижада жароҳатини оғирлаштирган. Кейинчалик у "Барселона" шифокорлари тавсия қилган жарроҳлик амалиётини рад этиб, консерватив даволанишни танлаган. Бу эса тикланиш муддатини узайтириши мумкин.
Шунингдек, Де Йонг ўзи ҳақидаги хабарлар юзасидан ОАВни очиқ танқид қилган. Манбага кўра, бу ҳолат маҳаллий журналистлар билан муносабатларни ҳам кескинлаштирган.
Marca'нинг ёзишича, Ҳанси Флик футболчини сардорлик вазифасидан ҳам четлатган. Расман бу қарор унинг жароҳати билан изоҳланаётган бўлса-да, манба бу ички жазо бўлиши мумкинлигини қайд этган.
Де Йонг яқинда "Барселона" билан узоқ муддатли шартномасини узайтирганига қарамай, клубда уни сотиш тарафдорлари пайдо бўлган. Жароҳати сабаб ёзда трансферни амалга ошириш қийин, аммо 2027 йил январда уни сотиш варианти истисно қилинмаяпти.
