«Барселона» бош мураббийи Ханси Флик Алехандро Бальденинг келажаги борасида тарқалаётган хабарларга муносабат билдирди. Сўнгги пайтларда испаниялик ҳимоячининг каталонияликлар сафини тарк этиши мумкинлиги ҳақидаги миш-мишлар кўпайган.

«Ўзгаришлар бўлиши мумкин. Трансфер ойнаси ёпилгунга қадар кутишимиз керак. Ҳаммасига фақат энг сўнгги паллада ойдинлик кириши мумкин», — деди немис мутахассиси.

Флик Бальденинг салоҳиятини юқори баҳолади, бироқ футболчи асосий таркибдаги ўрни учун рақобат қилишга тайёр эканини ҳар куни исботлаши кераклигини таъкидлади.

«Бу қийин савол, чунки у жуда катта салоҳиятга эга футболчи. Аммо у ўз позициясида рақобат қила олишига ишонадими-йўқми, буни билиш муҳим. Мен барча футболчиларимдан айнан шуни кўришни хоҳлайман.

Мен ҳар куни уларнинг қандай ишлаётганини, даражасини ва майдонга тушишга муносиб эканини кўрсата оляптими-йўқми — кузатаман. Охир-оқибат биз жамоа бўлиб ўйнашимиз керак. Фақат шундагина муваффақиятга эриша оламиз. Менга ҳар бир футболчи юз фоиз тайёр бўлиши керак», — деди Флик.

Шу тариқа, «Барселона» бош мураббийи Бальденинг жамоада қолишини кафолатламади ва унинг келажагига трансфер ойнаси якунида аниқлик киритилишини билдирди.