«Манчестер Юнайтед» Англия Премьер-лигасининг янги мавсумини кутилмаган мағлубият билан бошлади. Майкл Кэррик жамоаси 1-турда сафарда элитага қайтган «Ҳалл Сити»га 0:2 ҳисобида имкониятни бой берди.

Манкунианликлар учрашув давомида рақибдан бир қатор муҳим статистик кўрсаткичлар бўйича устунлик қилди. «Манчестер Юнайтед» 21 марта зарба берган бўлса, «Ҳалл Сити»да бу кўрсаткич 8 тани ташкил этди. Дарвоза томон аниқ зарбалар бўйича ҳам Кэррик жамоаси олдинда бўлди — 5:4.

Кутилган голлар (xG) кўрсаткичида ҳам «МЮ» устунлик қилди — 1,81 га 1,26. Шунга қарамай, меҳмонлар бирор марта ҳам рақиб дарвозасини ишғол қила олмади.

«Ҳалл Сити»га ғалаба келтирган голларни Семи Ажайи ва Нобель Менди киритди.

Қайд этиш жоиз, «Ҳалл Сити» 2016/17 йилги мавсумда Премьер-лигадан тушиб кетганидан кейин илк бор Англия элитасига қайтди.

Ушбу натижа «Манчестер Юнайтед» учун тарихий салбий кўрсаткич бўлди. Манкунианликлар Премьер-лига тарихида илк бор «Ҳалл»га мағлуб бўлди. Бунгача жамоалар ўртасидаги АПЛ баҳсларида «МЮ» 8 марта ғалаба қозонган ва яна 2 учрашув дуранг билан якунланган.

Шунингдек, «Манчестер Юнайтед» ўз тарихида илк марта мавсумнинг старт учрашувида Премьер-лигага янги чиққан жамоага мағлуб бўлди.