«Ланс» Франция Лига 1 доирасида ўз майдонида «Осер»ни йирик ҳисобда мағлуб этди.

Сермаҳсул кечган учрашув мезбонларнинг 5:2 ҳисобидаги ғалабаси билан якунланди.

«Ланс» 12-дақиқада ҳисобни очди. Флориан Товен пенальтини аниқ амалга оширди. 35-дақиқада эса «Осер» футболчиси Христа Макоссо майдондан четлатилди ва меҳмонлар ўн киши бўлиб қолди.

Иккинчи бўлим бошида «Ланс» устунлигини оширди. 49-дақиқада Франьо Иванович, 54-дақиқада Сауд Абдулҳамид гол урди — 3:0.

61-дақиқада Дэнни Намасо меҳмонларнинг биринчи жавоб голини киритди. Орадан беш дақиқа ўтиб, Пьер Ганью «Ланс»нинг тўртинчи голига муаллифлик қилди. 70-дақиқада Ламин Си ҳисобни 4:2 кўринишига келтирди.

Учрашувга якуний нуқтани Флориан Товен қўйди. У 88-дақиқада иккинчи бор рақиб дарвозасини ишғол қилиб, дубль қайд этди — 5:2.