«Lans» Fransiya Liga 1 doirasida o‘z maydonida «Oser»ni yirik hisobda mag‘lub etdi.

Sermahsul kechgan uchrashuv mezbonlarning 5:2 hisobidagi g‘alabasi bilan yakunlandi.

«Lans» 12-daqiqada hisobni ochdi. Florian Toven penaltini aniq amalga oshirdi. 35-daqiqada esa «Oser» futbolchisi Xrista Makosso maydondan chetlatildi va mehmonlar o‘n kishi bo‘lib qoldi.

Ikkinchi bo‘lim boshida «Lans» ustunligini oshirdi. 49-daqiqada Franyo Ivanovich, 54-daqiqada Saud Abdulhamid gol urdi — 3:0.

61-daqiqada Denni Namaso mehmonlarning birinchi javob golini kiritdi. Oradan besh daqiqa o‘tib, Pyer Ganyu «Lans»ning to‘rtinchi goliga mualliflik qildi. 70-daqiqada Lamin Si hisobni 4:2 ko‘rinishiga keltirdi.

Uchrashuvga yakuniy nuqtani Florian Toven qo‘ydi. U 88-daqiqada ikkinchi bor raqib darvozasini ishg‘ol qilib, dubl qayd etdi — 5:2.