Ўзбекистон Суперлигасида 19-тур баҳсларига старт берилди. Турнинг дастлабки учрашувида "Нефтчи" ўз майдонида "Сўғдиёна"ни 3:0 ҳисобида мағлуб этди. Фарғоналиклар ушбу ғалабадан кейин 19 ўйиндаги очколари сонини 45 тага етказиб, турнир жадвалидаги пешқадамлигини мустаҳкамлади.

Энди 19-турнинг қолган учрашувлари 24-26 август кунлари ўтказилади.

24 август куни соат 19:00 да "Қўқон-1912" "Бухоро"ни қабул қилади.

25 август куни учта учрашув режалаштирилган. Соат 19:00 да "Сурхон" — ОКМК ва "Андижон" — "Хоразм" баҳслари бошланади. Соат 20:00 да эса "Динамо" "Пахтакор" билан куч синашади.

26 август куни яна учта ўйин бўлиб ўтади. Соат 19:00 да "Локомотив" — "Бунёдкор" ҳамда "Машъал" — "Навбаҳор" учрашувлари ўтказилса, турга соат 20:00 да бошланадиган "Қизилқум" — "Насаф" баҳси якун ясайди.

Айни пайтда "Нефтчи" 45 очко билан биринчи ўринда. 18 тадан ўйин ўтказган "Пахтакор" 39 очко билан иккинчи, "Навбаҳор" 34 очко билан учинчи, "Бухоро" эса 33 очко билан тўртинчи поғонада бормоқда. 19 учрашувдан кейин "Сўғдиёна" 24 очко билан 10-ўринни эгаллаб турибди.