«Кристал Пэлас» ҳужумчи Жан-Филипп Матета бўйича тушадиган таклифларни кўриб чиқиши кутилмоқда.

29 ёшли франциялик футболчининг амалдаги шартномаси 2026/27 йилги мавсум якунида тугайди. Клуб келишувдаги бир йиллик узайтириш бандини 2024 йилда фаоллаштирган. Матета ва унинг вакиллари бу қарорга эътироз билдирган, бироқ Премьер-лига трибунали ҳамда ФИФА футболчининг талабини қаноатлантирмаган.

Ҳужумчига қизиқиш билдираётган клублар орасида «Астон Вилла» ҳам бор. Бирмингемликлар Олли Уоткинсни «Ал-Ҳилол»га сотиш масаласини кўриб чиқаётгани сабабли Матетани унинг эҳтимолий ўринбосарларидан бири сифатида белгилаган.

Янги шартнома тузилмаса, жорий трансфер даври «Кристал Пэлас» учун футболчини нисбатан юқори нархда сотишнинг сўнгги қулай имконияти бўлиши мумкин. Матета кейинги ёзда эркин агентга айланади.