"Арсенал"нинг собиқ футболчиси Алан Смит "Ал-Ҳилол"нинг Габриэл Мартинелли учун таклифи ҳақида фикр билдирди.
25 ёшли бразилиялик футболчи 50 миллион фунт стерлинг, яъни тахминан 58 миллион евро эвазига Саудия Арабистонига кўчиб ўтиши мумкин.
"50 миллион фунт? Ҳозирги футболда бу деярли ҳеч нарса эмас, шундай эмасми? Бундай пулга ўртамиёна футболчини сотиб олиш мумкин. Аммо Мартинелли ўртамиёна футболчи эмас", — деди Смит Sky Sports'га берган интервьюсида.
"Мартинелли кўп йиллар давомида жуда яхши ўйнади. Балки сўнгги пайтларда бироз пасайиш бўлгандир. У ҳали 25 ёшда. Агар кетишни истаса, фаолиятининг шу босқичида Саудия Арабистонига икки йилга бориб, кейин яна қайтиши мумкин", — қўшимча қилди собиқ футболчи.
Мартинелли 2019 йилдан бери "Арсенал" шарафини ҳимоя қилиб келмоқда. У Лондон клуби сафида 278 та ўйин ўтказиб, 62 та гол урган ва 36 та голли узатма амалга оширган.
