"Arsenal"ning sobiq futbolchisi Alan Smit "Al-Hilol"ning Gabriel Martinelli uchun taklifi haqida fikr bildirdi.

25 yoshli braziliyalik futbolchi 50 million funt sterling, ya’ni taxminan 58 million yevro evaziga Saudiya Arabistoniga ko‘chib o‘tishi mumkin.

"50 million funt? Hozirgi futbolda bu deyarli hech narsa emas, shunday emasmi? Bunday pulga o‘rtamiyona futbolchini sotib olish mumkin. Ammo Martinelli o‘rtamiyona futbolchi emas", — dedi Smit Sky Sports'ga bergan intervyusida.

"Martinelli ko‘p yillar davomida juda yaxshi o‘ynadi. Balki so‘nggi paytlarda biroz pasayish bo‘lgandir. U hali 25 yoshda. Agar ketishni istasa, faoliyatining shu bosqichida Saudiya Arabistoniga ikki yilga borib, keyin yana qaytishi mumkin", — qo‘shimcha qildi sobiq futbolchi.

Martinelli 2019 yildan beri "Arsenal" sharafini himoya qilib kelmoqda. U London klubi safida 278 ta o‘yin o‘tkazib, 62 ta gol urgan va 36 ta golli uzatma amalga oshirgan.