"Эвертон" бош мураббийи Дэвид Мойес Англия Лига кубоги ва Англия кубогидаги иштирокнинг жамоа учун қанчалик муҳим экани ҳақидаги саволга кескин муносабат билдирди.
Лига кубоги иккинчи босқичида "Престон"га қарши ўйин олдидан мутахассисдан жорий мавсумда кубок мусобақаларига қанчалик жиддий ёндашиши сўралди.
"Менимча, бу ҳар бир журналист ҳар бир мураббийга берадиган савол. Баъзан ўйлаб қоламан: журналистлар ростдан ҳам шунчалик аҳмоқми? Сиз қайсидир мураббий кубок ютишни истамайди, деб ўйлайсизми? Албатта, барчамиз соврин ютишни хоҳлаймиз. Шунинг учун жавоб — ҳа, бу мусобақалар жуда муҳим", — дея Мойеснинг сўзларини келтиради talkSPORT.
Шундан сўнг "Эвертон" устози журналистнинг ўзига савол бериб, у учун кубокни қўлга киритиш муҳимроқми ёки Премьер-лигада жойни сақлаб қолишми, деб сўради.
Журналист иккинчи вариантни танлагач, Мойес:
"Мана, бўлди. Саволингизга ўзингиз ярим жавоб бердингиз", — деди.
"Эвертон" 1995 йилдан бери бирор совринни қўлга киритмаган. Ўша йили жамоа Англия кубогида ғолиб чиққан эди.
