«Барселона» ва «Милан» клублари сафида тўп сурган ивуариялик ярим ҳимоячи Франк Кесси Италия A Сериясига қайтиши мумкин. Бу ҳақда ўз саҳифаларида журналист Фабрицио Романо хабар бермоқда.

Маълумотларга кўра, 29 ёшли футболчининг хизматларига Туриннинг «Ювентус» клуби жиддий қизиқиш билдирмоқда. «Кекса синьора» футболчининг вакиллари билан мумкин бўлган трансфер юзасидан фаол музокаралар олиб бормоқда.

Айни пайтда Франк Кесси эркин агент мақомида турибди. Ярим ҳимоячининг сўнгги жамоаси Саудия Арабистонининг «Ал-Аҳли» клуби бўлган эди. У ёзда шартнома муддати тугагани сабабли жамоани тарк этганди.

Эслатиб ўтамиз, ўтган мавсумда ярим ҳимоячи 39 та учрашувда майдонга тушиб, 9 та гол урди ва 5 та голли узатмани амалга оширди.