"Реал Сосьедад" бош мураббийи Пеллегрино Матараццо Испания чемпионати 1-туридан қолдирилган "Реал"га қарши учрашувдаги 1:4 ҳисобидаги мағлубиятдан кейин жамоаси тўғри йўналишда ҳаракат қилаётганини таъкидлади.
— Математик сифатида, ўтган мавсум охири ва жорий мавсум бошини ҳисобга олганда, жамоангиз еврокубоклар учун кураша олади, деб ўйлайсизми?
"Аввало, биз энди ўтган мавсумда эмасмиз. Иккинчидан, мен унчалик яхши математик эмасман: математикани ўрганганман, аммо бу билан шуғулланганимга жуда кўп йил бўлди. Менимча, сўнгги икки ўйинда жамоанинг ҳимояда бошқача ҳаракат қилаётгани ва бошқа тузилмадан фойдаланаётгани кўринди. Ҳозирча буни тўлиқ 90 дақиқа давомида амалга ошира олмаяпмиз, аммо бошқа жиҳатлар устида ҳам ишлаяпмиз. Шунинг учун тўғри йўналишда кетаётганимизга ишонаман. Шу билан бирга, ҳозир яна ғалаба қозона бошлашимиз кераклигини ҳам тушунаман", — деди Матараццо AS нашрига.
— Жамоа учинчи турдаёқ босим остида ўйнашга тайёрми? Ҳисобда ҳали очко йўқ ва олдинда мавсумдаги илк уй учрашуви турибди.
"Ҳар бир ўйин — жиддий имтиҳон. Албатта, биз ўз майдонимизда ўйнаймиз ва икки мағлубиятдан кейин босим ортади. Биз буни тушунамиз ва энди уч очкодан жамғара бошлаш вақти келганини биламиз. Бунинг учун мавсумдаги илк уй учрашувидан яхшироқ имконият бўлиши қийин. Шу боис ўйинга катта иштиёқ билан тайёрланяпмиз", — деди мураббий.
Айни пайтда "Реал" 6 очко билан Ла Лига турнир жадвалида етакчилик қилмоқда. "Реал Сосьедад" эса очкосиз 20-ўринда бормоқда.
