Франция терма жамоаси ва Лондоннинг «Арсенал» клубининг собиқ ҳужумчиси Тьерри Анри футболдаги улкан ютуқлари ва ушбу спорт тури ривожига қўшган ҳиссаси учун УЕФА президенти мукофоти билан тақдирланди.

«Тезлик, нафислик, маҳорат ва ҳужумларни якунлашдаги хотиржамлик Анрини барча даврларнинг энг яхши ҳужумчиларидан бирига айлантирди. У футболдаги тарихини жаҳон миқёсидаги эксперт сифатида ҳам давом эттирмоқда.

У ҳеч қачон ҳақиқатан муҳим масалалар бўйича ўз фикрини билдиришдан қўрқмаган. Анри доим камситиш ва ирқчиликка қарши чиқиб келди, руҳий саломатлик муаммолари ҳақида гапирди ҳамда кўплаб гуманитар ташаббусларни қўллаб-қувватлаш учун вақтини аямади.

Унинг майдон ташқарисидаги иштиёқи ва фаолияти машҳур «томирларида муз бор» деган таъриф унинг бутун моҳиятини ифодаламаслигини кўрсатди. Бу совуққонлик ортида илиқ ва атрофидагиларга чуқур бефарқ бўлмаган қалб яширинган», — дея УЕФА президенти Александер Чефериннинг сўзларини ташкилотнинг расмий сайти келтиради.

УЕФА президент мукофотини 1998 йилдан буён топшириб келади. Ушбу мукофот совриндорларнинг майдондаги ва майдон ташқарисидаги футболга қўшган улкан ҳиссасини эътироф этади.

Анри Лондоннинг «Арсенал» клубида фаолият юритган ва жамоа тарихидаги энг яхши тўпурарга айланган — у клуб сафида 228 та гол урган. Шунингдек, у АПЛ чемпиони бўлган.

Франциялик футболчи «Монако», «Ювентус», «Барселона» ва «Нью-Йорк Ред Буллз» клубларида ҳам тўп сурган. «Барселона» таркибида 2009 йилда Чемпионлар лигасида ғолиб чиққан.

Франция терма жамоаси сафида Анри 1998 йилги жаҳон чемпионати ва 2000 йилги Европа чемпионатида ғолиб бўлган.

У клублар ва миллий терма жамоа сафидаги фаолияти давомида жами 411 та гол урган.