Швейцариянинг "Лугано" клуби ҳимоячиси Беҳруз Каримов жамоа матбуот хизматига интервью берди.

"Лугано" — мен учун катта трамплин. Жамоада мени яхши кутиб олишди. Бу жамоа сафига қўшилганимдан жуда ҳам хурсандман. Ушбу саргузашт ҳаётим давомида мен учун катта роль ўйнайди. "Лугано" билан биргаликда яхши натижаларни қўлга киритишга ҳаракат қиламан.

Европа жамоаларида ўйнашни ёшлигимдан орзу қилардим. Ҳозирда мотивацияга бойман.

Жаҳон чемпионатидан кейин таклиф тушган кўп жамоаларни кузатдик. Улар орасида "Лугано" бизга маъқул келди. Шунинг учун бу жамоани танладим.

Ўзбекистон миллий жамоаси сафида Жаҳон чемпионатида иштирок этдим. Бу мен учун катта тажриба бўлди. Ўйин пайтида дарвоза томон зарба беришга ва ҳеч нарсадан қўрқмасликка кўпроқ ҳаракат қиламан. Агар қўрқмасам, бор имкониятларимини кўрсата оламан.

Асосий мақсадим ўзимиз иштирок этадиган барча мусобақаларда яхши натижани қўлга киритиш. Майдон ташқарисида хотиржам юришга ҳаракат қиламан. Ҳозирда эса инглиз ва итальян тилларини ўрганяпман.

"Лугано" клуби мухлисларидан эса бизни қўллаб-қувватлашларини сўрайман. Биз эса уларни қувонтиришга ҳаракат қиламиз. Forza Lugano!", — деди Беҳруз Каримов клуб матбуот хизматига берган интервьюсида.