«Болонья» «Кальяри» марказий ярим ҳимоячиси Мишель Адопо трансфери бўйича музокара олиб бормоқда. Бу ҳақда инсайдер Николо Скира хабар берди.

Манба маълумотига кўра, 26 ёшли француз футболчиси «Болонья» билан 2030 йилгача мўлжалланган шартнома имзолаши мумкин. Келишувни яна бир мавсумга узайтириш имконияти ҳам кўзда тутилган.

Ҳозирча эҳтимолий трансфер бўйича музокаралар давом этмоқда.

«Торино» ва «Аталанта»нинг собиқ футболчиси Адопо 2024 йил ёзидан буён «Кальяри» сафида тўп сурмоқда. Ўшанда Бергамо клуби уни дастлаб ижарага берган, кейин эса 3,8 миллион еврога Сардиния жамоасига сотган.

Мишель Адопонинг «Кальяри» билан амалдаги шартномаси 2029 йил ёзига қадар мўлжалланган.

У «Кальяри» сафида 81 та расмий учрашувда майдонга тушиб, 2 та гол урган ва 5 та голли узатмани амалга оширган.