А Серияда жаҳон чемпионатларида иштирок этган бирорта ҳам италиялик футболчи қолмади. Бу қизиқарли фактни журналист Жузеппе Пасторе ижтимоий тармоқларида қайд этди.
Бундай ҳолат дарвозабон Маттиа Перин Туриннинг «Ювентус» клубидан Италиянинг иккинчи дивизионида ўйнайдиган «Палермо»га ўтганидан, ҳимоячи Маттео Дармиан эса Миланнинг «Интер» клуби билан шартномаси якунланганидан кейин эркин агентга айланганидан сўнг юзага келди.
Перин ва Дармиан Италия терма жамоасининг 2014 йилги жаҳон чемпионати учун қайдномасидан жой олган эди. Ўша мусобақада «Скуадра Адзурра» гуруҳдан чиқа олмаган.
Шундан бери италияликлар жаҳон чемпионатларига бошқа саралана олмади ва сўнгги учта мундиални — 2018, 2022 ва 2026 йиллардаги турнирларни ўтказиб юборди.
Жорий мавсум А Серияси учун қайд этилган 200 нафар италиялик футболчи орасида жаҳон чемпионатларида иштирок этган бирорта ҳам футболчи йўқ.
