«Ньюкасл» бош мураббийи Маттиас Яйссле Англия Премьер-лигасининг 2-турида «Тоттенхэм» устидан 2:0 ҳисобида қозонилган ғалабадан сўнг жамоаси ўйинига юқори баҳо берди.

«Бу ажойиб эди. Клуб ва мураббийлар штаби сифатида майдонда ўйин режасини юқори даражада бажараётган жамоани кўриб турганимиздан жуда фахрланамиз. Футболчиларнинг иш жараёнига тўлиқ киришиб кетганини кўриш ҳам жуда ёқимли», — дея Яйссленинг сўзларини келтиради Sky Sports.

«Бу яхши старт. Ҳозир бу лаҳзадан завқланиш мумкин. Ўтган ҳафта «Ливерпуль»га қарши ҳам яхши ўйнагандик. Шунинг учун трансфер ойнасида катта харидларни амалга оширган яна бир кучли рақибга қарши бундай ўйин биз учун тўғри йўналишдаги навбатдаги қадам бўлди».

Мутахассис рақибнинг кучли ва заиф томонларини таҳлил қилиш муҳимлигини ҳам таъкидлади.

«Биз қандай синов кутаётганини билардик. Аммо унга қандай жавоб берганимиз менда катта таассурот қолдирди. Мураббий сифатида доим рақибга қаерда босим ўтказиш мумкинлигини излайсан, ўша зоналарни топасан ва таҳлил қиласан. Бугун айнан шу жиҳат муҳим бўлди. Лекин умумий олганда, рақиб ким бўлишидан қатъи назар, ўз тамойилларимизга содиқ қолишга ҳаракат қиламиз. Бугун бу иш берди», — деди Яйссле.

«Ньюкасл» икки турдан кейин 4 очко тўплаб, АПЛ турнир жадвалида 3-ўринда бормоқда.