Каталониянинг «Барселона» жамоаси шанба куни бўлиб ўтган Испания чемпионати доирасидаги «Райо Вальекано»га қарши учрашувда 4:0 ҳисобида ғалаба қозонган бўлишига қарамай, ўзига хос антирекорд ўрнатди. Гап шундаки, шу кеча «Барселона» умумий тўпни назорат қилиш бўйича рақибга имкониятни бой берган - 49%га 51%.
Бир қарашда оддий натижа, лекин «Барселона» учун эмас. Жамоа нақд 316 учрашувдан буён бундай «ёмон» натижа қайд этмаган экан. Ўтган 5 йил давомида «Барселона» ҳеч қачон рақибдан тўпни назорат қилиш борасида ортда қолмаган. Бу ҳолат охирги марта 2008 йилнинг 7 майида кузатилган. Ўшанда Франк Рейкард бошчилигидаги «Барселона» меҳмонда «Реал»га 1:4 ҳисобида имкониятни бой берган.
