Эркин агент мақомидаги Тангуй Ндомбеле «Марсель» билан эҳтимолий трансфер бўйича келишувга эришди. Бу ҳақда After Foot дастури иштирокчиси Валид Ашерчур хабар берди.
29 ёшли ярим ҳимоячи «Ницца»ни тарк этганидан сўнг эркин агентга айланган. Манба маълумотига кўра, у «Марсель» билан аллақачон келишувга эришган футболчилардан бири ҳисобланади.
Бироқ трансфер ҳали кафолатланган эмас. Франция клуби янги футболчиларни рўйхатдан ўтказишдан олдин бир қатор ўйинчилар билан хайрлашиши керак. «Марсель» трансфер ойнаси ёпилиши арафасида молиявий чекловларга дуч келмоқда.
Ндомбелени жамоа бош мураббийи Бруно Женезио жуда яхши билади. Мутахассис у билан аввал «Лион»да бирга ишлаган.
«Марсель» жорий трансфер ойнасида ҳали бирорта ҳам янги футболчи харид қилмаган. Якшанба куни «Монако»дан 0:2 ҳисобида мағлуб бўлинганидан сўнг клубдаги вазият янада мураккаблашган.
Женезио таркибни кучайтиришдан олдин кетишлар зарурлигини очиқ айтди: «Эҳтимол, бир ёки икки янги футболчи олиш учун уч-тўрт нафар ўйинчи жамоани тарк этиши керак».
Ндомбеле трансфери маълум даражада таваккалчилик ҳам ҳисобланади. У ўтган мавсумда чов соҳасидаги жароҳат сабаб атиги 13 та учрашувда майдонга тушган ва мунтазам ўйин амалиётига эга бўлмаган.
Ашерчур ҳам футболчининг жисмоний ҳолатига саволлар борлигини таъкидлади.
«Женезио уни жуда яхши кўради. Ндомбеле ўтган йили «Ницца»да эди ва ҳозир «Марсель» билан келишувга эга. Лекин у ҳозир жисмоний ва атлетик жиҳатдан топ даражада эмас. Бундай футболчилар яна оптимал формага қайтиши керак», — деди у.
