Erkin agent maqomidagi Tanguy Ndombele «Marsel» bilan ehtimoliy transfer bo‘yicha kelishuvga erishdi. Bu haqda After Foot dasturi ishtirokchisi Valid Asherchur xabar berdi.

29 yoshli yarim himoyachi «Nissa»ni tark etganidan so‘ng erkin agentga aylangan. Manba ma’lumotiga ko‘ra, u «Marsel» bilan allaqachon kelishuvga erishgan futbolchilardan biri hisoblanadi.

Biroq transfer hali kafolatlangan emas. Fransiya klubi yangi futbolchilarni ro‘yxatdan o‘tkazishdan oldin bir qator o‘yinchilar bilan xayrlashishi kerak. «Marsel» transfer oynasi yopilishi arafasida moliyaviy cheklovlarga duch kelmoqda.

Ndombeleni jamoa bosh murabbiyi Bruno Jenezio juda yaxshi biladi. Mutaxassis u bilan avval «Lion»da birga ishlagan.

«Marsel» joriy transfer oynasida hali birorta ham yangi futbolchi xarid qilmagan. Yakshanba kuni «Monako»dan 0:2 hisobida mag‘lub bo‘linganidan so‘ng klubdagi vaziyat yanada murakkablashgan.

Jenezio tarkibni kuchaytirishdan oldin ketishlar zarurligini ochiq aytdi: «Ehtimol, bir yoki ikki yangi futbolchi olish uchun uch-to‘rt nafar o‘yinchi jamoani tark etishi kerak».

Ndombele transferi ma’lum darajada tavakkalchilik ham hisoblanadi. U o‘tgan mavsumda chov sohasidagi jarohat sabab atigi 13 ta uchrashuvda maydonga tushgan va muntazam o‘yin amaliyotiga ega bo‘lmagan.

Asherchur ham futbolchining jismoniy holatiga savollar borligini ta’kidladi.

«Jenezio uni juda yaxshi ko‘radi. Ndombele o‘tgan yili «Nissa»da edi va hozir «Marsel» bilan kelishuvga ega. Lekin u hozir jismoniy va atletik jihatdan top darajada emas. Bunday futbolchilar yana optimal formaga qaytishi kerak», — dedi u.