Мексиканинг Мичоакан штатида болалар ўртасидаги футбол учрашуви вақтида ноодатий ҳодиса юз берди. Бу ҳақда De Ultimo Minuto хабар қилди.

Ўйин давомида кичик бир пода сигир тўсатдан футбол майдонига чиқиб кетди. Ҳайвонларнинг пайдо бўлиши ёш футболчилар орасида саросимага сабаб бўлди.

Болалар дарҳол тўпни ташлаб, трибуналар томон қоча бошлади. Сигирлар эса улар томон ҳаракатланишда давом этди.

Вазият янада хавфли тус олиши мумкин эди, аммо шу пайт маҳаллий ит ҳайвонларнинг йўлини тўсди.

Тўрт оёқли қаҳрамон сигирларга қарши чиқиб, уларни майдондан ҳайдашга ҳаракат қилди. Итга мураббийлардан бири ҳам ёрдам бериб, қўлларини силкитган ҳолда ҳайвонларни орқага қайтарди.

Натижада сигирлар футбол майдонини тарк этди ва хавф бартараф этилди.

Шундан сўнг болалар ўртасидаги учрашув давом эттирилди.