ФИФА президенти Жанни Инфантино Россия ҳукуматига алоқадор хусусий самолётлардан, эҳтимол, президент Владимир Путиннинг самолётларидан ҳам фойдаланган. Бу ҳақда The Telegraph хабар берди.

Манба маълумотига кўра, Инфантино ФИФА раҳбари лавозимида иш бошлаган дастлабки кунлариданоқ қоидаларни бузган. Жумладан, амалдор Россия ҳукуматига алоқадор самолётлардан бемалол фойдаланган.

Инфантино 2016 йил февраль ойида ФИФА президенти этиб сайланган. Ўша йилнинг июнь ойидаёқ федерациянинг юқори лавозимдаги ходимлари ундан шикоят қилган. ФИФАнинг ахлоқ қўмитаси томонидан ўтказилган тергов ҳанузгача тўлиқ ошкор қилинмаган.

Инфантино бўйича бошқа даъволар орасида — онаси билан Папа Римский билан учрашувга ФИФА маблағлари ҳисобидан боргани, 2,1 миллион евро маошдан бош тортгани (бу суммани жуда кам деб ҳисоблаган) ва ходимларни юқори маошли лавозимларга тайинлагани бор. Шунга қарамай, унга нисбатан санкциялар қўлланилмаган ва Инфантинонинг ўзига қўйилган айбловлар олиб ташланган.

Ҳозирда у ўз лавозимини ҳимоя қилишда давом этмоқда. Жаҳон чемпионатини хусусийлаштириш режаси муваффақиятсизликка учраганидан сўнг, унга нисбатан танқидлар кучайди.