Букайо Саканинг голи ўтган дам олиш кунлари «Арсенал»га «Астон Вилла» устидан ғалаба келтирди. Шу билан бирга, ёш ҳужумчи клуб тарихида ўтган аср охирларида порлаган Иан Райтнинг натижасини ҳам ортда қолдирди.
Гап шундаки, Саканинг Англия Премьер-лигасида урган голлари ва голли узатмалари «Арсенал»га жами 82 очко олиб келган.
Иан Райтда бу кўрсаткич 80 очкони ташкил этади ва у энди, табиийки, натижасини яхшилай олмайди.
Ушбу кўрсаткич бўйича Сакадан олдинда фақат уч футболчи бор. Тьерри Анрининг гол ва ассистлари «Арсенал»га 160 очко келтирган. Кейинги ўринда 112 очко билан Деннис Бергкамп, ундан сўнг эса 92 очко билан Робин ван Перси бормоқда.
2018 йилдан буён «Арсенал» шарафини ҳимоя қилиб келаётган Сака энди ушбу рўйхатда тўртинчи ўринни эгаллаб турибди.
