«Комо» испаниялик дарвозабон Роберт Санчес билан шартнома имзолаганини эълон қилди. Италия клуби расмий сайти маълумотига кўра, 29 ёшли голкипер «Челси»дан 2026/27 йилги мавсум охирига қадар ижара асосида ўтди.
Санчес «Леванте» тарбияланувчиси ҳисобланади, 15 ёшидан эса «Брайтон» тизимида фаолият олиб борган. «Форест Грин Роверс» ва «Рочдейл»даги ижара даврларидан сўнг у «Брайтон»га қайтди ва 2020 йил ноябрь ойида Англия Премьер-лигасида дебют қилди. Кейинчалик жамоанинг асосий дарвозабонига айланди.
2023 йил август ойида Санчес «Челси» сафига қўшилди. У Лондон клуби билан 2025 йилги Клублар ўртасидаги жаҳон чемпионатида ғолиб чиқди. Мусобақада 6 та ўйинда майдонга тушган дарвозабон «Олтин қўлқоп» совринига ҳам сазовор бўлди.
Роберт Санчес Испания миллий терма жамоаси сафида 2 та ўйин ўтказган. Шунингдек, у Евро-2020 ва 2022 йилги жаҳон чемпионати учун терма жамоа қайдномасидан ҳам ўрин олган.
