«Komo» ispaniyalik darvozabon Robert Sanches bilan shartnoma imzolaganini e’lon qildi. Italiya klubi rasmiy sayti ma’lumotiga ko‘ra, 29 yoshli golkiper «Chelsi»dan 2026/27 yilgi mavsum oxiriga qadar ijara asosida o‘tdi.
Sanches «Levante» tarbiyalanuvchisi hisoblanadi, 15 yoshidan esa «Brayton» tizimida faoliyat olib borgan. «Forest Grin Rovers» va «Rochdeyl»dagi ijara davrlaridan so‘ng u «Brayton»ga qaytdi va 2020 yil noyabr oyida Angliya Premyer-ligasida debyut qildi. Keyinchalik jamoaning asosiy darvozaboniga aylandi.
2023 yil avgust oyida Sanches «Chelsi» safiga qo‘shildi. U London klubi bilan 2025 yilgi Klublar o‘rtasidagi jahon chempionatida g‘olib chiqdi. Musobaqada 6 ta o‘yinda maydonga tushgan darvozabon «Oltin qo‘lqop» sovriniga ham sazovor bo‘ldi.
Robert Sanches Ispaniya milliy terma jamoasi safida 2 ta o‘yin o‘tkazgan. Shuningdek, u Yevro-2020 va 2022 yilgi jahon chempionati uchun terma jamoa qaydnomasidan ham o‘rin olgan.
