«Монако» ҳужумчиси Фоларин Балогун ёзги трансфер ойнасининг сўнгги кунида «Эвертон»га ўтиш фикридан қайтди.

Sky Sports маълумотига кўра, АҚШ терма жамоасининг 25 ёшли футболчиси бундай қарорни «Монако» Ламин Камаранинг «Челси»га трансферини бекор қилганидан кейин қабул қилган.

Балогун 40 миллион фунтлик трансферни якунлаш учун бир кун аввал туш пайти Ливерпулга етиб келган эди. Аммо кун давомида тиббий кўрик билан боғлиқ муаммолар сабаб битим атрофида илк шубҳалар пайдо бўлди.

Шу пайтда «Монако» Камарани «Челси»га сотиш устида иш олиб бораётган, «Эвертон» эса Балогун бўйича келишув шартларини қайта кўриб чиқишни хоҳлаган.

Вазият трансфер дедлайнидан кейин янада чигаллашди. «Монако» соат 23:00 дан кейин Камаранинг «Челси»га ўтишини бекор қилди. Орадан кўп ўтмай, ярим тунда Балогуннинг ўзи ҳам «Эвертон»га ўтишдан воз кечди.

Натижада бир кечанинг ўзида икки йирик трансфер амалга ошмай қолди ва бу ҳолат «Монако» ҳамда «Челси» томонида катта норозиликка сабаб бўлди.