Олий лига ўйинлари олдидан матбуот анжумани ўтказилмаса-да, Ўзбекистон кубоги финал баҳси олдидан бош мураббийлар иштирокида матбуот анжуманини ўтказиш анъанага кириб қолган. Бу сафар ҳам ҳам ташкил этилган маросимнинг дастлабки қисмида “Бунёдкор” бош мураббийи Миржалол Қосимов иштирок этди. Шунингдек, Александр Пишур ҳам журналистларнинг саволларига жавоб берди.

— Эртага бизни қизиқарли ва муҳим ўйин кутиб турибди. Боиси, Кубок соҳиби келаси йили ОЧЛда тўғридан-тўғри иштирок этиш ҳуқуқини беради. Жанговар ўйин бўлиши кутилмоқда. “Насаф” ҳам бу ўйинга жиддий тайёргарлик кўраётганидан хабарим бор. Қаршиликлар бунгача 3 марта финалга чиқиб, унда ғолиб чиқа олишмаганди. Бу йил Рўзиқул Бердиев жамоани яхши шакллангантира олди ва клуб яхши ўйин кўрсатмоқда. Шунинг учун бизга қарши жиддий қаршилик кўрсатишади. “Бунёдкор” ҳам ташкил топганидан бери совринларни ютиб келмоқда. Бу ўйин биз учун муҳим аҳамиятга эга. Эртанги ютуқни қўлга киритсак, чемпионатдаги кейинги ўйинларимизга ҳам ижобий таъсир кўрсатади. Шунинг учун ҳам биз фақат ғалаба учун майдонга тушамиз, — дейди Миржалол Қосимов.

Александр Пишур:
— Эртаги ўйин бошида бўладиган ҳаяжондан тезроқ қутулиб олиб, ўз ўйинимизни кўрсатишимиз керак. “Насаф” ўйин борасида Ўзбекистоннинг энг яхши жамоаларидан бири. Биз ижобий натижага умид қиляпмиз.

—    “Навбаҳор” билан ўйинда шогирдларингиз узоқ масофалардан дарвозага зарба йўллашга ҳаракат қилишди. Эртанги ўйинда бу ҳолатни ҳам кўришимиз мумкинми?
—    Дарвозага зарба бермасанг, гол бўлмайди. Машғулотларда доимий равишда бунинг устида ишлаймиз ва ҳар бир ўйин учун тайёргарлик ишларини олиб борамиз. Эртанги ўйинда ҳам дарвоза томон кўпроқ зарбалар беришга ҳаракат қиламиз.

—    Финал олдидан “Насаф”нинг ўйинларини қанчалик ўргандингиз?
—    Жамоанинг “Локомотив”га қарши ўйинини ўргандик, “Пахтакор” билан ўйинини кўриб чиқдик. Қаршидаги ўйин жанговар кечган. 71-дақиқада “Пахтакор” томонидан урилган гол туфайли дуранг натижа қайд этилди. Жамоа етакчиси Артур Геворкян жуда кучли ўйинчи. У “Пахтакор” билан ўйинда хаёлан финалга тайёргарлик кўраётганини сезилиб турганди. Эртанги ўйинда уни ёпишга ҳаракат қиламиз. Бундан ташқари Бердиев ҳар бир ўйинчига имкон бериб, уларнинг ўсишини таъминламоқда. Шунинг учун Насаф”нинг ҳар бир ўйинчисидан хавф кутиш мумкин.

—    Сиз миллий терма жамоа бош мураббийи сифатида эртанги ўйинда “Насаф” футболчиларини ҳам кузатасизми? Масалан, сўнгги пайтларда Илҳом Юнусов ва Эркин Бойдуллаев яхши ўйин кўрсатишмоқда.
—    Нафақат улар, балки “Шўртан”дан келиб қўшилган Лазиз Убайдуллаев ҳам яхши ўйин кўрсатмоқда. У майдон марказида Геворкянга ёрдам бериб, унинг ишини енгиллаштирмоқда. Умуман олганда, ҳозирда миллий чемпионатимиздаги ёш футболчилар орасида терма жамоага муносиб футболчилар кўп. Мусаев, Иброҳимов, Убайдуллаев, Козак ва ҳоказоларни таъкидлаб ўтишим мумкин.

— Эртанги ўйиннинг асосий ва қўшимча дақиқаларида дуранг қайд этилса, пенальтилар сериясида ғолиб номи аниқланади. Жамоа бунга қандай тайёргарлик кўряпти?
—    “Яхши ният — ярим мол”, деган гап бор. Иложи борича ўйиннинг ўзида масалани ҳал қилишга ҳаракат қиламиз. Лекин машғулотлар давомида пенальтиларни машқ қиламиз.

—    Футболчи сифатида 2 марта Ўзбекистон кубогини қўлга киритган бўлсангиз, мураббий сифатида бир марта ютуққа эга бўлгансиз. Иккинчи томондан “Бунёдкор” тоқ йиллари Кубокни қўлдан чиқармоқда...
—    Эртанги ўйинда ғолиб чиқсак, умумий кубокларим сони нечта бўлади? Тўрттами?..

— Жамоадан Нестеровдан ташқари жароҳатланган футболчилар йўқми?
—    Нестеровдан ташқари жароҳат олган футболчилар йўқ. Ҳамма ўйинга тайёр.

— Александр, сиз “Навбаҳор” билан ўйинда майдонга тушмаган бўлсангиз, ундан олдинги турда бўлиб ўтган “Шўртан”га қарши ўйинда ўйинингиз чиқмади. Эртанги ўйинга руҳан тайёрмисиз?
А.Пишур: —    Ҳа, тайёрман. Ҳаммаси жойида.

—    Мутахассис сифатида айтингчи, стадионга мухлисларнинг ташрифи камайиб кетганига сабаб нимада ва мухлисларни стадионга қайтариш учун нима қилиш керак?
—    Миллий чемпионатимиз жудаям кучли бўлиши керак. Ҳар бир ўйинда кескин курашлар бўлиши лозим. Масалан, Россия чемпионатини олиб қарайдиган бўлсак, “Рубин” ушбу турда “Том”га ютқазди. Мана шундай ўйинлар бўлса, мухлислар ўз-ўзидан кўпаяди. Ҳар бир жамоа ўзаро рақобатлаша олишса, ўткинчи ўйинлар бўлмаса, Мана шундай ўйинлар бўлса, ҳар бир ўйинда футболчининг ҳам малакаси ошади. Ўйинлар давомида тўп учун жиддий кураш, тез фикрлаш, ўйинчини алдаб ўтиш каби ҳолатлар бўлса, мухлисларда ўйинга нисбатан қизиқиш уйғотади. Ўйин шунчаки ўткинчи бўлса, бунга қизиқиш юқори бўлмайди.