Камерун футбол федерацияси президенти Самюэль Это’О УЕФА Африка футболи дуч келаётган муаммоларни тўлиқ тушуна олмаслигини айтди.

Эслатиб ўтамиз, июль ойи охирида ФИФА Жаҳон чемпионати трансляция ва тижорий ҳуқуқларини сотиш учун FIFA Forward Enterprise (FFE) номли янги тижорий тузилма ташкил этишни режалаштираётгани маълум бўлган эди.

Кейинчалик Инфантино футбол конфедерацияларининг танқиди ва УЕФА аъзоси бўлган мамлакатларнинг ЖЧни бойкот қилиш эҳтимоли ортиши фонида бу ғоядан воз кечди. Шундан сўнг айрим Европа футбол федерациялари 2027 йил март ойида бўлиб ўтадиган ФИФА президентлиги сайловида Инфантино номзодини қўллаб-қувватлашдан бош тортди.

«Биз европаликлар билан ҳеч қачон воқеаларга бир хил нуқтаи назардан қарай олмаймиз. Бюджети 150 минг евро бўлган айрим федерациялар катта давлатлар билан қандай рақобат қила олади?

Ҳеч ким Африка федерациялари раҳбарлари ўз мамлакатларида футболни қандай бошқараётганини сўрамайди. Агар иқтидорли футболчилар хорижга кетса, айб бизга юкланади. Аммо Камерун йилига 20 ёки 40 миллион долларлик бюджетга эга бўлганида, албатта, бизда ҳам ўз Мбаппе ва Тчуамени бўлар эди. Футболимизни яхшироқ ташкил қилган бўлардик», — деди Это’О L’Equipe нашрига берган интервьюсида.