Ўзбекистон Суперлигасининг 20-туридан ўрин олган "Қизилқум" — "Бухоро" учрашуви якунланди. Сермаҳсул кечган баҳсда мезбонлар 3:2 ҳисобида ғалаба қозонди.
Ҳисоб 42-дақиқада очилди. "Бухоро" футболчиси Хуршид Мухторов тўпни ўз дарвозасига киритиб қўйди ва "Қизилқум" биринчи бўлимни минимал устунлик билан якунлади.
Танаффусдан кейин голлар сони янада кўпайди. 52-дақиқада Жаба Жигаури Руслан Розиевнинг узатмасидан кейин мезбонларнинг иккинчи голини урди. 64-дақиқада Отабек Жўрақўзиев ҳисобни йирик кўринишга келтирди — 3:0.
Шундан сўнг "Бухоро" камбэк қилишга уриниб кўрди. 73-дақиқада Шерзод Эсанов меҳмонларнинг биринчи жавоб голини урган бўлса, орадан тўрт дақиқа ўтиб захирадан майдонга тушган Ника Качарава ҳисобни 3:2 кўринишига келтирди.
Учрашувнинг 87-дақиқасида "Бухоро" футболчиси Анвар Жўраев майдондан четлатилди. Қолган вақтда ҳисоб ўзгармади ва "Қизилқум" муҳим уч очкони қўлга киритди — 3:2.
